В лето Господне 1204. французы и латини, заводом папежа римскаго Инокентия третияго, пустил пред собою такой голос, якобы Иеросалима и святую землю от агарян свободити, на восточныя страны вдалися: идеже вместо Иеросалима и агарянов нечаянно нападоша на Константинополь град, и овладеша им, и прилежащыя ему грады, царь же Алексий утек. а патриарха изгнаша. Ниже. И что наконец от тех злых, яко безбожни латини, по разорении и взятии Константина града в нем учинили. ови священныя иконы, безчестно от украшений и клейнотов отревали, и по низ топтали, овии святыя мощи, кости святых мученик с честных мест, на нечистыя места извергали, но еже и слышати страшно, сие тогда видимо бяше, яко пречистое тело и животворящую кровь, из потиров на землю проливаху, и пометаху священныя сосуды. и олтарныя. и престольная украшения, в простыя мисы и кубки и иныя потребы, в наслаждение антихристова предотеча, и безбожных его действ, действенницы обращаху. Дозде из книги О вере.
Оставляю прочая их греком и всему востоку злотворства. еликая на Флоренском соборе и по соборе том показаша, коликая насилования творяху, коликия во Афонской горе монастыри благоверных расхитиша, коликая иноки помучиша, принуждающе на унею: изволяяй да чтет историю о Флоренском соборе печатную во Острозе лета 1598-го. точию великую заноску и дмение папежев изъявляю о чем великий учитель и богослов Софроний Лихудиев грек пишет: Звягут [рече] папежницы, яко папа, всякий закон, всякий суд, в себе самом имать. он все может творити, еже Христос творит. Он есть (глаголют) зде на земли, по вознесении Христове на небеса, вторый Христос, и туюжде власть имать и силу, юже и Христос имяше прежде неже вознестися на небеса. он (глаголют) имать совершенную власть обоего меча мирскаго и церковнаго, зане папы и Христа един престол. он судия есть вселенныя, сам же ни от кого имать сужден быти. он вся судит, зане ничтоже может согрешити. зде о сицевом превозношении папине не неприлично рещи апостолом святым Павлом глаголанная: да никтоже вас прельстит ни по единому образу: яко аще не приидет отступление прежде, и открыется человек греха сын погибели, противник и превозносяйся паче всякаго глаголемаго бога или чтилища, яко сести ему в церкви Божией, аки богу: яко папа о себе мечтает. еже толкуют святии и мудрии толковницы, яко сести ему не во Иеросалимской церкви но в Римстей и о сем довольно разумеваяй разумевай. дозде Софроний.
Заключая же моя сия доводы.
Из книги О вере от слова 30-го предлагаю еже творец того, от послания Иоаннова приводит.
Дети последняя година есть, и яко же слышасте, яко анихрист грядет, и ныне антихристи мнози. о правде! яко много предотечев его но и сам уже близ есть по числу еже о нем 666, число бо человеческое антихристово. кто весть аще в сих летех, 1666-х, явственных предотечев его или того самого не укажет. И ниже. К сему же и сие воспомянути не отрекуся, еже и святый Иоанн евангелист во Апокалипсии, во главе 20 пишет о связании сатаны на тысящу лет и потом о развязании, возвращается диавол на первое свое место, идеже еще из неба хотел и от того времене поветрием тяжким поражен бысть запад, о сем пространно во главе 21 обрящеши. по тысящном лете, егда 595-е дохождаше лето, явственное бысть отступление и прельщение нарицающихся юнитов от святыя восточныя церкве, к западному костелу: о сем чти главы напреди 23 и 24-ю, а по исполнении лет числа тысящи шести сот, шестидесяти, шести не непотребно и нам от сих вин опасение имети да не некое бы что зло пострадати по преждереченных, исполнения писаний свидетельств, яко настоит день Христов яко же рече апостол. и несть ли готовым быти подобает. аще кто достигнет тех времен, на брань с самым диаволом. [и ниже: от слова 50-го святаго Ефрема приводит сие] убоимся и мы любимицы мои, да не и мы в сия впадем: писанная бо вся совершишася, и несть ино ничтоже прочее, токмо соперника нашего, еже есть антихристова слава. на конец бо римскаго царства, подобает всему совершитися. что же несть ли убо совершилося о римских царех. яко престати сим царствовати но ниже убо слышится имя царских царей за многая лета в последнее сие время, яко бы рещи, от великаго Карла, всю же власть от тех времен царскую и святительскую папа на себе привлече, вкупе и царь и святитель наречеся. не явный ли сей антихристов предотеча. что же нам о сем время отлагати: но достоит всегда с богословцы едино с покаянием глаголати с Петром апостолом. якоже рече: не коснит Господь обетования, якоже нецыи коснение мнят, но долготерпит на нас, да вси в покаяние приидут: и прочая. Ниже. Тем же всегда в памяти своей нам всем православным, подобает имети прежде бывшия вины, и сему внимати; яко по тысящи лет от воплощения Божия Слова, Рим отпаде со всеми западными странами от восточныя церкве в пятьсотное же девять десят пятое лето по тысящи, жители в Малой России к римскому костелу приступили, и на всей воли римскаго папы заручную грамоту дали ему. се второе отрвание христиан от восточныя церкве. оберегая же сие пишет: егда исполнится 1666 лет, да нечто бы от преждебывших вин зло некаково не пострадати и нам, но покаянием Бога умилостивити и милость Его нам к себе привлещи. Дозде из книги О вере.
Тем же аще хощеши сын святыя церкве быти, повинися предложенным свидетельствам. сказующим ти, яко конец уже прия римское царство: И время антихристово открыся. А что зде единых и тех же антихристами, и предотечами антихристовыми наричет, то по свойству дела разньствующих в себе: почему и антихрист и предотеча антихристов едино лице может нарещися.